Primeiro partido de eliminatoria da fase de ascenso a primeira autonómica; e as xogadoras do Goldie Xiria mostráronse, ante o seu público, orgullosas do equipo que son, e loitadoras ata o final a pesar das circunstancias, que en forma de lesión, chegaron ao longo dos 60 minutos. As pivotes Sheila e Natalia non puideron acabar o encontro e son seria dúbida de fronte ao partido de volta. Dúas xogadoras moi importantes no bloque defensivo carballés, que farán o posible por recuperarse e volver loitar con todas as súas compañeiras no 40×20.
Un partido con estratexias diferentes na parcela defensiva. O Goldie expuxo un 5:1 con Sheila no avanzado e o Bm Culleredo unha 6:0 compacta. Empezaba de maneira igualada para os dous conxuntos, minutos cun ritmo alto, en que as rivais medíanse e asentábanse no encontro. Mediada a primeira parte, o 5:1 deixaba de funcionar e o Culleredo conseguía unha vantaxe de ata 6 goles que cortaría o Goldie cos cambios efectuados tras un tempo morto. Ao descanso chegábase con 9 a 13.
Na segunda metade, tras uns minutos bos das do Goldie que nos convidaban a soñar coa remontada, viría un baixón físico que aproveitaría o Bm Culleredo para irse ata os 10 goles de diferenza. Pero o orgullo destas bergantiñás é moi grande; e loitarían ata o último minuto para deixar o marcador en 19 a 27.
O vindeiro sábado, xogarase o partido de volta en Culleredo.