O Laber Xiria cae nun partido igualado diante do Teucro

S.D. Teucro 29 – Laber Xiria 27(16-14)

Partido de máxima intensidade o disputado na mañá do domingo en Pontevedra entre dous equipos que se xogaban a clasificación directa para a disputa a vindeira tempada da División de Honra, ao final vitoria do Teucro diante do Laber Xiria.

Comezou o encontro con dúas intensas defensas que non permitían lanzamentos claros aos atacantes, o Xiria era capaz de frear aos lanzadores exteriores e so en xogadas co pivote e con penetracións era o Teucro capaz de chegar ao porteiro carballés, en ataque a circulación do balón era trabada e as perdas de balón pola precipitación foron numerosas. O criterio arbitral favorecía claramente ao Teucro, que ata por once veces dispuxo de lanzamento de sete metros a favor. Con renda de 2 goles para o Teucro íase ao descanso.

Máis resolutivo no ataque e coa mesma intensidade defensiva saíu o Xiria na segunda metade, igualando o encontro, pero esta intensidade en defensa pasoulle factura por mor do arbitraxe que castigou en exceso ao Laber con numerosas exclusións e lanzamentos de sete metros. Chegouse a un final igualado onde calquera puido facerse coa vitoria, tivo o Xiria balón para empatar pero a precipitación pasou factura en varias ocasións.

Agora o Laber Xiria non depende de si mesmo para optar meterse entre os seis primeiros, deberá cumprir nas dúas xornadas restantes ante Porriño e Sar, e agardar o fallo dos seus rivais.

SD Teucro 29 (16): Eduardo Lores e Javier Codina (porteiros) , Manuel Escudero, Martín Suárez 2, Sérgio Pérez 1, Cristian Rameseiro 8, Tomás Omil 2, Juan Estevez 2, Pedro Estevez 1, Gonzalo Domínguez 2, Mario Chan 7 e Omil Ravier 4.

Laber Xiria 27 (14): Samuel Castiñeiras e Diego Lema (porteiros) Fran Rey 6, Andrés Urbieta, Manuel Sánchez, Mario Cancela, Roi Alfeirán 3, Renzo Díaz, Iker Martínez, Santo Oreiro 1, Alex Gómez 8, Iago Rincón 4, Dani Trigo e Pedro Pereira 5.

Arbitraron: Marcos Pérez e Gabriel Folgoso, castigaron excesivamente ao Xiria