O Goldie Xiria Carballo Turismo, non foi capaz de asinar a cuarta vitoria consecutiva no seu desprazamento a Ourense este pasado Domingo.

Foi un choque dominado polas locais e con arreóns das bergantiñás, que se mostraron xenerosas no esforzo e que mesmo conseguiron colocarse por diante no marcador despois dun frío comezo.

O conxunto da cidade das Burgas comezaría o partido superando con claridade o 6:0 das de Xiria e aproveitando os erros e multiples fallos no lanzamento do seu rival. Foi un 5-1 inicial que deu paso a vantaxes cómodas nos primeiros dez minutos, xusto antes do primeiro tempo morto solicitado polo Goldie Xiria unido a un cambio defensivo a 5:1 que cambiaría as tornas do acontecido ata o momento. Os dez minutos seguintes serían dominados polas de Carballo que grazas ás recuperacións de balón colocábanse agora por diante no marcador (8-9 minuto 20). Nunha montaña rusa de idas e vindas, as locais lograrían nos seguintes cinco minutos un parcial de 4-1 que lles faría tomar de novo unha cómoda vantaxe (12-9) que aumentarían ata os cinco oles de diferenza cando os equipos tomaban o camiño dos vestiarios no tempo de descanso (16-11).

Un voluntarioso Goldie Xiria Carballo Turismo sairía no segundo acto buscando a remontada, un obxectivo que se alcanzaría nos primeiros cinco minutos reducindo as diferenzas a tres goles, pero que quedaría a medias, chegando aos últimos dez minutos con esa desvantaxe. Un último arreón das locais cun 4-1 de parcial, aproveitando as precipitacións dun Xiria á desesperada, acabaría por pechar un partido que o Pavillón de Ourense soubo xogar sen nerviosismo e cun bo control das situacións que se presentaron.