Este venres desprazábanse ao Pabellón de Bastiagueiro as verdinegras do Punta del Este Xiria, para a disputa dun partido moi emocionante ante o CBM Atlántico, primeiras de liga.

As nenas entraban no partido con máis nervios do normal, o que provocaba moitas perdas de balón e lanzamentos precipitados que foron mellorando segundo pasaban os minutos. Pero as locais non perdoaban e traballaban en ataque para marchar no marcador o antes posible.

Cun 17-13 ao descanso, a segunda parte foi como un borrón e conta nova para as do Xiria, que cunha intensa defensa que roubaba balóns e provocaba perdas das locais, e un ataque decidido e con velocidade, conseguía achegarse no marcador.

Finalmente, cun 29-28 non conseguían o empate polo que tanto loitaron na segunda parte, pero as rapazas do Punta del Este remataron o partido con moi boas sensacións.

Na vindeira xornada, o Punta del Este Xiria recibirá en Carballo ao Bm. Xallas FC.