NORDATA XIRIA 19 – 16 DURÁN BARCIA BM CAÑIZA

Décimo sexto partido de Liga Ouro, no que o Nordata Xiria se enfrontou na casa ao Bm. Cañiza. Partido no que ambos equipos se estaban a xogar moito nesta xornada, pois na recta final da Liga Ouro os postos do 5º ao 9º están moi apertados con respecto a puntos. Comezaban o partido as do Nordata con moitas ganas e determinación, sorprendendo ao equipo rival cunha defensa 6:0 moi unida. En ataque atopaban situacións claras de lanzamento grazas ao incansable desmarque de todas as xogadoras ante unha defensa 3:3 moi presionante, e logo ante unha defensa 6:0 moi plana. 

Na segunda parte o Bm. Cañiza intentou presionar un pouco máis ao Nordata Xiria cunha defensa 5:1, pero sen moito éxito, xa que o ataque local non tivo problemas para atopar situacións de lanzamento. Quen si lle dou problemas ás locais foi a portería do Bm. Cañiza, negándolle ao extremo esquerdo nin un só gol en todo o partido, e con paradas moi explosivas que acercaban ao Bm. Cañiza no marcador ao final do encontro. 

Con esta vitoria as do Nordata volven a poñerse quintas a falta de 2 xornadas para o remate da liga, pero sabendo que calquera fallo pode costarlles este quinto posto terán que demostrar ata o final do que son capaces. 

A próxima xornada, dentro de dúas semanas, tócalles xogar fóra da casa fronte ao Sanxenxo Balonman-Dislausa. 

Nordata Xiria: Ana Velo, Sara Trigo, Lucía Castiñeiras (5), Natalia Varela (7), África Gómez (6), Mara Vidal (1), Inés Cabeza, Zaira Longueira, Aroa Lista, Eva Vidal, Alba Mourelle.