A liga de 1ª nacional esgotou tan só seis xornadas desde o seu comezo, pero xa se puido comprobar que, lonxe de ser un tópico, calquera conxunto vai atopar con numerosas dificultades, especialmente a domicilio. Así, como xa ocorrese puntualmente en anteriores xornadas, na de hoxe, o Unión financera de Oviedo sufría a súa primeira derrota ante o recentemente ascendido Carnes Do Ribeiro, o Lalinense acababa impoñéndose ao Teucro despois de comezar perdendo 10-3 e mesmo o Calvo Xiria tiña que apertar os dentes e sufrir para sacar unha nova vitoria ante un gran Seis Do Nadal.
O encontro de Coia foi intenso, duro e unha proba de lume, como así se prevía. Foi un partido onde os de Carballo sabían que se atoparían con “sorpresas” tácticas e ao que ían mentalizados para traballar sesenta minutos ante as esixencias que a recado se ían a atopar. O conxunto local comezaba cunha defensa 3:3 moi móbil e solidaria, tentando entorpecer a velocidade do balón da primeira liña carballesa, aceno de identidade inequívoca deste equipo. Os verdinegros, con todo, adoptaban a pausa e o timing necesario para encarar con éxito a portería rival e conseguían espazos efectivos para o lanzamento. A defensa do Calvo, pola contra, pasaba serias dificultades desde o principio, sendo a basculación defensiva e os cambios de opoñente, dúas tarefas a mellorar. Tampouco se mostraban contundentes os bergantiñáns nas situacións de 1×1, sufrindo en demasía o bloque central. O cambio de 6:0 a 5.1, tampouco solucionou os problemas da retagarda e os de Carballo, que estiveran desacertados nos últimos minutos nas situacións francas desde os seis metros, encaraban o túnel de vestiarios cunha mínima vantaxe nestes primeiros trinta minutos (14-15).
Na segunda parte vivíronse os momentos máis críticos do Calvo Xiria, que chegaría a situarse catro goles por baixo do seu rival (24-20). Foron minutos moi complicados para os visitantes, que vían como as transicións dos olívicos e o contragol facían dano a unha defensa totalmente desubicada. O Seis Do Nadal aproveitaba as exclusións dos carballeses, que chegarían a estar en pista con tan só catro xogadores e gozaba dunha maior lucidez no ataque posicional.
Afrontábase o último tramo do encontro e os verdinegros apertaban defensivamente para recuperar o terreo perdido. En ataque minimizábanse os erros e a mobilidade da primeira liña conseguía o seu obxectivo, superar á defensa e chegar ata os seis metros para perforar a portería do “ Sedona”. Iván Amarelle e Brais, facendo forte o bloque central defensivo e Pablo Iglesias liderando o ataque con Chimpo, pletórico nos lanzamentos de media distancia, colaboraban nun sobresainte traballo colectivo final para dar a volta ao marcador cun parcial de 5-11 nos últimos quince minutos e situar ao Calvo Xiria colider con 11 puntos, os mesmos que o Construcciones Castro Lavadores que ascende á cabeza da clasificación.
Magope Seis Do Nadal – Coia: 31 (14+17). Andrea Marie Pichel, Daniel Salgueiro, Enrique Antonio, Andrés Alberto Novoa, Diego Fernández (3), Martín Gayo (6), Denis Estévez (3), Yago Santomé (3), Marcos Treinta (2), Diego Rivas, Xacob Novoa, Cristian Bretal, Pedro Toimil (7), Abraham Alonso (7), Jorge Gayo.
Calvo Xiria: 35 (15+20). Iago Gómez (p), Antonio Mato (p), Carlos Vilanova (5), Gabriel Castiñeiras, Julián López (1), Brais Puñal, Pablo Iglesias (9), Chimpo (10), Carlos García (2), Iago Franco, Juan Carlos Rodríguez (2), Manuel Méndez (1), Jorge Bouzas (1), Alejando Calvete (1), Iván Amarelle (2), Enrique Pena Pensado (1).
Parciais cada 5´: 1-3 / 6-6/ 9-8/ 11-11/ 12-14/ 14-15/Descanso/18-17/ 23-20/ 26-24/ 27-27/ 31-31/ 31-35. Final
Colexiados: Pablo Álvarez e Marcos Pérez. Excluiron a Denis Estévez e a Andrés Alberto Novoa por parte dos locais e a Carlos Vilanova, Carlos García, Juan Carlos Rodríguez, Enrique Pena e Iván Amarelle (2) por parte dos visitantes.
Incidencias: Encontro da 6ª xornada da 1ª nacional celebrado nun pavillón de Coia con boa afluencia de público.