O Goldie Xiria Carballo Turismo, decide o derbi na segunda parte

Non foi un derbi vistoso o que se puido vivir no pavillón do CEIP Fogar o pasado sábado. As imprecisións dominaron boa parte do encontro entre o Goldie Xiria e o Conservas Boya BM. Encaixe Camariñas, aínda que se houbo incerteza e emoción por un marcador que non romperon de forma definitiva as de Carballo ata o segundo acto.

O dominio das locais, sobre todo en tarefas defensivas, non se referendaba na portería contraria, xa que as do Goldie sumaban continuas perdas de balón na transición cara ao marco visitante. A pesar das dificultades coas que se atopaban as de Camariñas fronte á retagarda local, mostrábanse pacientes e non lle perdían a cara ao partido, aproveitando os erros do seu rival para adiantarse no marcador durante o primeiros dez minutos e para manterse preto das mesmas a partir do meridiano do primeiro acto. Curiosamente, as de Carballo conseguirían asinar a máxima diferenza cando se daba paso ao tempo de descanso (11-8).

Chegaba o tempo da continuación con todo por decidir e tres precipitacións consecutivas do Goldie Xiria Carballo Turismo, dilapidaba, en tan só minuto e medio, a vantaxe adquirida ao final do primeiro acto (11-10). O técnico local, veríase entón obrigado a solicitar o seu segundo tempo morto para reordenar ao seu equipo. Os cambios efectuados, sobre todo na retagarda, que funcionaba agora cun 5:1 zonal sobre a parte esquerda do ataque camariñán, pronto comezarían a dar os seus froitos e as recuperacións de balón, que xa estaban a ser moitas ao longo do partido, acentuábanse a favor das de Xiria nestes instantes. O que non melloraría, eran as situacións en transición despois desas recuperacións e é que o Goldie Xiria Carballo Turismo seguía perdendo balóns ou fallando lanzamentos diante da potera rival.

Aos poucos e co paso dos minutos, o conxunto de Carballo foi puíndo eses erros e a través da pausa e o “ timing”, conseguiría atopar o mellor momento para correr e ser efectivas tanto no pase longo como nos lanzamentos ante a portería rival. Desta forma, as carballesas sentenciarían o encontro nos últimos vinte minutos e cun contundente parcial de 9-2, conseguirían dous importantes puntos que lles achegan a unha vitoria da quinta praza, posto que agora mesmo ocupa o Obra Civil Cíes BM. Chapela, rival das de Carballo o vindeiro domingo. En caso de vitoria, o Goldie Xiria Carballo Turismo, instalaríase nese quinto posto que outorga a posibilidade de xogar o play- Off.

Goldie Xiria Carballo Turismo: 24 (11+13). Sara Pose (p), Carla Santiago, Aida Vizcaino (3), Mina Ribullen (3), Tamara Pombo, Minia Calvo, Jessica Posse (4), Natalia Solís (4), Alba Rodríguez (2), Elena Segade (3), Sheila Ferreiro (2), Raquel Gómez (2), Eva Calvelo (1), Saray Couto.

Conservas Boya-Encaixe BM.Camariñas: 13 (8+5). Paula, Ana, Miriam (1), Yanira (1), Cristina (2), Andrea, Aretta (1), Maimouna (5), Bineta, Agueda, Marta (1), Paula, Sara (2).

Colexiados: Cesar Carballo e Julio Ferreiro. Non tiveron o seu mellor día, aínda que non influiron no resultado final.

Parciais cada 5´: 1-3 / 3-4 / 7-5 /8-6 / 9-6 / 11-8 – Descanso – 12-10 / 15-11 / 16-11 / 18-12 / 22-13 / 24-13 – Final.

Incidencias: Encontro correspondente a 16ª xornada da 1ª autonómica feminina disputado no pavillón do Ceip Fogar o pasado sábado. Afluencia notable de público que enchíu as bancadas do pavillón colexial para ver o derbi.