Penúltima xornada de liga para o Marmolería José Rey Xiria, que caeu na casa ante un Bm Lucus cunha maior antropometría física e baseando o seu xogo en defensa 6:0 e ataque 1×1 dos seus xogadores máis fortes.

Os infantís do Marmolería José Rey deron a cara ante a superioridade física rival. Un equipo baseado en xogadores de primeiro ano e que necesitan máis experiencias como as vividas hoxe no Carballo Calero.

Os primeiros instantes do encontro, os de Carballo, tentaban buscar espazos polo centro do 6:0 lucense, co que chocaban unha e outra vez sen conseguir opcións claras de lanzamento. Déronse conta que tiñan que ampliar o espazo de xogo e aproveitar máis aos extremos e Marcos Amarelle aproveitouse das asistencias dos seus compañeiros para marcar con facilidade na portería visitante. Ao descanso chegábase con 10 a 10.

Xa na segunda parte, sufría a defensa 3:3 do Xiria que permanecía demasiado atrás ante un Lucus máis grande. Trataba de subir a primeira liña de defensa e presionar máis aos xogadores para roubar balóns, pero unha e outra vez o Lucus conseguía golpes francos para chegar ao 1×1.

Co que non contaban os locais é con sufrir nas zonas exteriores ante dous extremos fortes que se recibían eran capaces de superar e lanzar nos 6 metros.

O marcador final foi de 21 a 23 favorable ao Lucus.

O Marmolería José Rey Xiria deberá seguir desenvolvendo o aspecto físico coas tarefas de cargas habituais e seguir progresando no seu xogo como ata agora.

Incidencias: Partido disputado no pavillón Carballo Calero ante uns 75 espectadores de ambos os conxuntos.

Colexiados: Iván Hernández e Renzo Martín Díaz do colexio Galego.