1ª Nacional
O Calvo Xiria recupera algúns efectivos para este desprazamento ás illas Canarias. O seu rival, o Balonmán Ingenio cun dos persoais máis completos da categoría poñerá en dificultades a un conxunto de Carballo que se prepara para afrontar este difícil compromiso o sábado ás 20:00 horas (21:00 hora peninsular). E é que o reto de gañar a un equipo da experiencia de Bm Ingenio é unha motivación máis ao traballo que vén realizando o equipo.
A continuidade e a claridade de ideas no ataque posicional son importantes, para non conceder contraataques cómodos aos locais, que son o equipo que máis goles realiza da categoría. O Calvo Xiria terndrá que poñer o mono de traballo na faceta defensiva para frear ao conxunto local; polo que se espera un partido emocionante.
1ª Autonómica Feminina
O Calvo Xiria xogará o sábado ás 16:15 no pavillón Novo Mesoiro contra o Bm Brigantium Nunegal. Dous equipos con obxectivos diferentes neste momento e onde o Calvo Xiria busca a segunda praza do grupo e parte como favorito para facerse cos dous puntos; debido á maior experiencia dentro da categoría.
Categorías Base; Liga Ouro
O Hierros Varela Urbieta Xiria recupera a case todo o persoal para afrontar este desprazamento a Pontevedra e xogar o domingo ás 12:30, no pavillón Monte Da Vila contra o Rasoeiro Bm. O equipo buscará a quinta vitoria da tempada.
O Grupo Lemaco Xiria A xogará o domingo ás 10:30 contra o Gasoleos Rivera en Carballiño. Debe conseguir unha vitoria que o mantén na loita polo campionato de liga.
O Punta do Leste Xiria A xogará o sábado contra Bm. Porriño no Vila de Noia ás 10:30. Un partido difícil que servirá para probar a progresión que vén de facer o xoven equipo de Carballo.
Categorías Base; Liga Prata
Comeza a segunda fase para o equipo xuvenil do Laber Xiria B que xogará o sábado ás 12:15 no Vila de Noia contra Reca Hollywood Seis Do Nadal.
O Grupo Lemaco Xiria B, xogará o mércores ás 21:00, no pavillón San Marcos contra Abegondo Casa Torreiro. Dous puntos de gran importancia para os intereses dun Xiria que neste momento é primeiro de grupo.
Categorías Base; Alevíns
Insplaber Xiria e Reneymar Xiria xogarán ás 10:00 e ás 11:00 contra Culleredo e Camariñas, respectivamente. Farano en Santiago, onde se concentra esta semana a xornada de Bm5.