O Calvo Xiria volvía a desputar un encontro no Vila de Noia tralas dúas semanas de parón e cumpliu con solvencia todas as expectativas. 

As coruñesas chegaban a Carballo sen puntos na clasificación o que podía dar pé á relaxación, mais aconteceu todo o contrario. Tras uns primeiros minutos con certas dúbidas, o Xiria pronto tomou as rendas do encontro apoiado en boas accións defensivas e goles rápidos de contraataque.  O ritmo do encontro era moi alto por parte das carballesas e coas primeiras rotacións a velocidade no xogo non facía máis que incrementarse ata chegar ó descanso cunha renda de quince goles.

Coa reanudación, o cambio de defensa das carballesas, certa relaxación e as múltiples rotacións non permitían incrementar en exceso a diferenza da primeira metade. Aínda así, as sensacións do equipo eran boas e co bo ambiente nas bancadas todo o equipo puido desfrutar dun bo partido.

Resultado final de 41-23, coa mirada xa posta no encontro da próxima semana en Salceda de Caselas onde as nosas xogaranse a cuarta plaza.