Vitoria do Garaysa A ante o Reconquista [34-32] e derrota do Garaysa B en Arteixo [34-22]

Nova fin de semana de competición para os equipos do Garaysa Xiria, con resultados diferentes pero encontros moi esixentes.

En Carballo, o Garaysa Xiria A impúxose ao Reconquista de Vigo por 34-32 nun partido moi disputado. A primeira metade estivo marcada polo protagonismo dos ataques, chegando ao descanso cun 20-18 favorable aos locais. Na segunda parte, o encontro mantívose igualado ata o final, con alternativas no marcador, pero varias accións defensivas positivas do Xiria nos últimos minutos foron clave para decantar o partido e asegurar a vitoria.

Pola súa banda, o Garaysa Xiria B caeu en Arteixo por 34-22 fronte ao equipo local. A pesar de realizar un bo xogo colectivo e competir durante moitos momentos, os carballeses pagaron caro os numerosos erros de lanzamento, chegando a fallar ata 24 ocasións claras, o que se reflectiu finalmente na diferenza do marcador.

Dúas citas que deixan aprendizaxes importantes para ambos equipos, que continúan a traballar e competir con compromiso en cada xornada.