Este fin de semana teremos outra xornada repleta de balonmán en E. BM. Xiria. Moitos destes enfrontamentos se levarán a cabo entre o pavillón Vila de Noia e o do CEIP Fogar e é que en ata oito encontros os diferentes conxuntos do club actuarán como locais.
O partido máis destacado, será sen dúbida o que enfronte na 1ª nacional ao Calvo Xiria e ao Bueu Atl. Balonmán o Sábado ás 18:00 h no Vila De Noia. Será un enfrontamento de novo vital para as aspiracións dos bergantiñáns, dado o apertada que está a clasificación. O conxunto verdinegro debe de seguir coa súa boa serie e só un triunfo asegúralle como mínimo seguir nesa segunda praza de privilexio que actualmente ocupa. O Bueu Atl será un difícil rival, que posúe un extenso persoal e unha notable calidade en todos os postos.
Outro dos partidos destacados e tamén en categoría senior, pero neste caso en feminino, será o derbi que o Sábado ás 16:00 h enfronte en Ponte Do Porto ao Encaixe Camariñas Conservas Boya e ao Goldie Xiria. As carballesas, que xa foron capaces de alzarse cos dous puntos en xogo na primeira volta, darán un importante golpe en caso de vitoria, aínda que o excelente carácter competitivo das locais non llo poñerá nada fácil.
Xa en División De Honra, os equipos de E. BM.Xiria retoman a competición despois do parón do fin de semana pasado. O Grupo Lemaco Xiria cadete farao en primeira instancia, será o Sábado ás 11:30 h no pavillón do CEIP Fogar e ante o Rasoeiro BM. Non hai marxe de faio para os carballeses se queren seguir posicionados nos postos altos e con opcións de alcanzar posicións máis altas. Pola súa banda, pero xa o Domingo, os infantís do Garaysa e xuvenís do Laber, reciben ao Nova Xestión Pavillón (11:15 e 12:45 respectivamente) no Vila De Noia. Os infantís, ben colocados na táboa, esperan sumar dous novos puntos para seguir na loita polos postos que dan opcións a xogar a fase estatal e os xuvenís, despois da dura derrota hai dúas semanas contra a SAR de Redondela, vense obrigados a saír vitoriosos fronte a un equipo ao que xa derrotaran con contundencia na primeira volta.
En segunda División, teremos os enfrontamentos de categoría infantil feminina entre Asador A Ronda RC Arteixo e Punta Del Este Xiria por unha banda (Sábado 12:30 h pavillón Galán- Oseiro, Arteixo) e Garaysa Xiria- Ribadosar por outro (Domingo 11:30 h pavillón CEIP Fogar). Os dous equipos de Carballo esperan poder sumar dous novos triunfos, as nenas do Punta Del Este para seguir a súa serie triunfal que lles fai contar os seus partidos por vitorias e as do Garaysa, despois de conseguir estrear a súa marcadora de puntos, para enlazar dúas vitorias consecutivas, que sería unha maneira excelente de fortalecerse animicamente. Na mesma división, pero na categoría cadete masculino, o Xiria Hierros Varela Urbieta aspira a mostrar o seu poderío ante o líder Ribadosar Amancio Deportes o Domingo ás 10:00 h no pavillón do CEIP Fogar.
Pechamos a xornada cos dous equipos alevíns de BM7. Mentres o Xiria A exercerá de local ante o BM.Xallas (Pavillón CEIP Fogar, Sábado 10.00 h), o Xiria B viaxa a Coruña para enfrontarse ao Línea 21 no pavillón de Novo Mesoiro o mesmo día ás 13:00 h.