03/11/2007 CALVO XIRIA 39 – MECALIA ATL. NOVÁS 26
Calvo Xiria (20+19) 39: Quique, Cristophe (2), Cuco (2), Roberto (11), Chimpo (3), Bruno (3) e Fernando Vázquez (7) -equipo inicial- Iago, Sebastián (6), Pombo (1), Alex, Jesús, Pablo (2) e Manuel (2).
At. Novás (14+12) 26: Alberto, Eros (1), Roberto (7), Esteban González (5), Esteban (1), Benigno (1) e Noé (1) .equipo inicial- Santiago, Marcos, Manuel (4), Eduardo, Óscar (1), Pablo (2) e Yago (3).
Árbitros: Pablo Goitia e César Carballo. Ben. Sen complicacións.
O Calvo Xiria solventou de forma plácida o partido que lle enfrontou ao Atl. Novás en Carballo. O conxunto de Marcos Rodríguez apenas atopou resistencia nun rival que só aguantou o ritmo dos carballeses nos primeiros quince minutos de encontro. Quizais por mor do horario, na mañá do domingo, o Calvo Xiria tardou en desperezarse e permitiu que o conxunto visitante alternara o dominio no marcador, nun comezo marcado polas imprecisións de ambos conxuntos. A inspiración de Fernando Vázquez en ataque bastoulle ao conxunto local para, a partir do ecuador do primeiro tempo, ir abrindo distancias no marcador fronte a un Atl. Novás que aproveitaba as facilidades defensivas dos carballeses para evitar que a segunda parte fora de trámite. Aínda así, o Calvo Xiria remataba o primeiro tempo cunha vantaxe de seis goles (20-14), que poñía moi costa arriba o partido para os do Rosal. A marcha máis que meteu o Xiria na recta final do primeiro acto bastoulle para encarrilar o partido e confirmar que as prestacións ofensivas do equipo están fóra de toda dúbeda neste primeiro tramo de temporada.
A segunda metade foi un calco da primeira. Os dous equipos alternaron ataques de éxito nos primeiros dez minutos (26-20), momento no que o Calvo Xiria decidiu dar outro arreón. Cun parcial de 6-1, os locais deixaban visto para sentenza o partido con aínda moitos minutos por xogar (32-21). Sebastián collía o relevo anotador de Fernando Vázquez antes de que Roberto comezara o seu duelo particular con Alberto, porteiro co que coincidiu nas filas do Lalín. O xogador do Calvo Xiria gañaba claramente a partida ao cancerbeiro visitante e, o que é mellor, recuperaba as boas sensacións de principio de liga cunha nova exhibición en ataque (11 goles). Marcos Rodríguez aproveitou a segunda metade para dar minutos a todos os xogadores do equipo, co obxectivo de coller confianza de cara aos próximos partidos a xogar polos carballeses. No horizonte máis próximo divísase o sorprendente Oleiros, partido que se antolla clave para clarificar o papel que desenvolverá o Calvo Xiria na segunda volta do campionato de liga.
