Os equipos de Garaysa Xiria viviron unha xornada de contrastes, con dous partidos moi diferentes en desenvolvemento pero igual de esixentes.
No primeiro encontro, disputado na pista do Liceo La Paz, o Garaysa Xiria B caeu por 48-27 ante un rival que se mostrou moi superior, especialmente no apartado físico. Os locais impuxeron o seu ritmo dende o inicio e aproveitaron cada erro para ampliar diferenzas. A pesar do marcador, os carballeses plantaron cara durante todo o partido, competindo con entrega e sen deixar de loitar en ningún momento.
Xa na mañá do domingo, o Garaysa A viaxou ata Cangas coa oportunidade de colocarse líder da Liga Prata en caso de vitoria. O encontro foi moi igualado e vertixinoso, con constantes ataques e contraataques. Ao descanso, os de Carballo perdían por catro goles (19-15), pero na segunda metade reaccionaron con carácter, chegando a poñerse dous goles por diante. Nos minutos finais, a precipitación e pequenos detalles decidiron o choque, que acabou cun axustado 39-38 a favor do conxunto local. O Garaysa Xiria A pecha así a xornada na 4ª posición, a dous puntos do liderado, mantendo intactas as súas aspiracións e demostrando que pode competir ante calquera rival.
A vindeira semana o Garaysa Xiria B descansará e o Garaysa Xiria A recibirá na mañá do sábado ao Seis do Nadal.
