O Tubasys Xiria asinou un empate (31-31) ante o Cisne nun encontro moi igualado e de gran intensidade, no que os carballeses tiveron que traballar ata o último minuto para conseguir sumar un punto.
O encontro comezou cun ritmo elevado e con alternativas no marcador. O Tubasys Xiria conseguiu tomar a iniciativa nos primeiros minutos, pero o Cisne reaccionou rapidamente e conseguiu chegar ao descanso cunha vantaxe de tres goles (16-19).
Na segunda metade, o conxunto carballés deu un paso adiante e mellorou tanto en ataque como na intensidade defensiva. Pouco a pouco, o Xiria foi recortando distancias ata volver poñerse por diante no marcador, nunha segunda parte na que ambos os equipos loitaron de poder a poder.
Nos minutos finais, o Cisne conseguiu abrir unha vantaxe de tres goles cando apenas restaban tres minutos para o final. Lonxe de renderse, o equipo carballés mostrou un enorme carácter e protagonizou unha espectacular reacción, sendo quen de remontar os tres goles no tramo decisivo para igualar o encontro (31-31).
A igualdade mantívose ata o último ataque, con máxima tensión sobre a pista. Finalmente, o marcador quedou nun empate que premia o esforzo dun Tubasys Xiria que nunca baixou os brazos e que foi quen de loitar ata o último segundo.
