Este próximo fin de semana, avecíñase unha xornada de enfrontamentos de altura en Escolas Balonmán Xiria. Se a iso engadimos que na maioría dos casos son os últimos encontros antes do parón do Nadal, poderemos asegurar que estaremos ante unha xornada de gran emoción e tensión competitiva.
O envite que atrae a maior expectación, é o choque que o Sábado protagonizarán o Calvo Xiria e Acanor Atl. Novás (Pavillón Vila De Noia 18:00 h) e é que se os rosaleiros son líderes da competición, os carballeses son segundos a un só punto destes, o cal nos indica que á parte de ser un dos mellores partidos que se poden ver na categoría, o primeiro posto estará en xogo. Esperase un gran ambiente de balonmán tanto na pista como nas bancadas, xa que numerosos seareiros dos visitantes desprazaranse desde O Rosal para unirse ás altas previsións de afluencia por parte da afección de Carballo.
A continuación do partido senior masculino, entrarán en liza o Goldie feminino (Pavillón Vila de Noia 20:00 h), que recibe ao conxunto da SAR, un equipo que se mostrou superior ás carballesas no encontro de ida e ao que estas queren devolverlles a mesma moeda no último envite do ano.
Os conxuntos de División de Honra, pola súa banda, desprázanse a Vigo para enfrontarse ao Seis Do Nadal en infantil, cadete e xuvenil. Mentres os infantís e cadetes liquidaron con solvencia e de forma avultada os enfrontamentos da primeira volta, os xuvenís perderon de maneira clara, co que se preveen choques moi diferenciados nas tres categorías. Os encontros levaranse a cabo o Sábado no pavillón de Coia, iniciando os xuvenís (10:00 h), despois os cadetes (11:30) e por último os infantís (13:00 h).
Seguimos no Sábado e tamén pola mañá:
en categoría alevín, Xiria A e Xiria B disputarán un duelo entre amigos que promete ser un encontro cun ambiente especial na pista e as bancadas (Pavillón CEIP Fogar 11:00), pero os máis madrugadores serán tamén os máis pequenos (Pavillón CEIP Fogar 10:00), xa que os benxamíns de OAK e Clínica Dental Pico Branco, tamén se enfrontarán entre eles na competición de Copa Delegación de BM5. Pola súa banda, o Punta Del Este feminino tentará terminar o ano coa súa marcadora de derrotas en branco e para iso debe de impoñerse ao BM. Lucus ás 12:30 no pavillón do colexio.
Os outros conxuntos masculinos e femininos de 2º División, competirán o Domingo:
Mentres os nenos de Hierros Varela Urbieta desprázanse a Santiago para enfrontarse ao Ribadosar Táboa Asesores coa intención de terminar o ano no magnífico estado de forma polo que atravesan (Pavillón Quiroga Palacios 11:25), as nenas do Garaysa farano a Culleredo para enfrontarse ao equipo desta localidade e referendar, do mesmo xeito que os cadetes, a súa progresión no xogo despois duns inicios máis dubitativos (Pavillón Almeiras 11:00 h). Baixarán o pano desta xornada os infantís masculinos do Marmolería J. Rey no mesmo escenario e contra o BM. Culleredo Constru. Pereiro coa ilusión de terminar o ano sumando dous importantes puntos (12:30 h).
