Para mañá, mércores, pola noite está prevista a chegada do xogador internacional arxentino Sebastián Gonzalo Álvarez que xogará no Calvo Xiria nesta campaña que escomeza. Trátase dun lateral esquerdo, aínda que se adapta a calquera das tres posicións da primeira liña, de 24 anos, 1’85 m e 76 kg, internacional absoluto coa selección albiceleste. A pasada campaña militou no equipo Sagrado Corazón onde con 117 goles foi o máximo goleador do torneo de apertura. Posteriormente proclamouse campión da I Liga Nacional co equipo Forjar Salud Córdoba. O xogador porase ás ordes de Marcos Rodríguez o antes posible para poder comezar a competición ligueira dentro de dúas semanas. Ademáis integrarase no cadro técnico do club traballando coas categorías de base.

Categorías coas que xa comezou a traballar Juan Manuel Rodríguez Martínez (Bueu 1982), que se incorpora ao corpo técnico do Xiria. O adestrador bueense é Licenciado en Ciencias da Actividade Física e do Deporte (INEF), Técnico Superior en Animación de Actividades Físicas e Deportivas (TSAAFD), Diplomado en Maxisterio de Educación Física e Monitor de Balonmán, e atópase cursando estudos de Terceir o Ciclo (Programa de doutoramento en Investigación en Didácticas Especiais e Educación Física e Deportiva). O novo adestrador encargarase, baixo a supervisión do director técnico, Marcos Rodríguez, da dirección de varios dos equipos de base do club carballés. Neste sentido conta cunha importante experiencia xa que foi adestrador durante varias campañas nas categorías de base do Bueu Atlético Balonmán.