Cinco xogadores de E.BM.Xiria estarán presentes no campionato de España de seleccións autonómicas que se celebrará en Almería nos próximos días. O club de Carballo terá representación nas tres categorías masculinas, tal e como vén sendo habitual dende hai anos: infantil, cadete e xuvenil. Alejandro Gómez en infantís, Andrés Vila en cadetes e Antonio Mato, Carlos Vilanova e Iván Calvo en xuvenís, serán os xogadores carballeses encargados de representar a Galicia na cita deste ano. A todos eles desexámoslles dende o noso club a mellor das sortes, esperando que todos poidan gozar desta bonita experiencia. Desexar tamén que aqueles que acaban de saír dunha lesión, como é o caso de Andrés ou que están en proceso de recuperación, como Iván, teñan sorte e poidan cumprir as súas expectativas sen máis problemas físicos.
As seleccións galegas partirán o día 1 de xaneiro en dirección a Almería. O campionato de España disputarase entre os días 3 e 8 de xaneiro nas localidades de Almería, Vícar, Roquetas e El Ejido.
