Resultados positivos nas categorías territoriais

A pasada fin de semana os equipos das categorías territoriais infantís acadaron sendas vitorias ante o Bm Lucus, unida á vitoria do conxunto B de balonmán alevín 7.

Xustamente foron os alevíns os primeiros en saltar á cancha do Pavillón do CEIP Fogar ante o Bm Xallas. Un partido moi disputado e no que a maior mobilidade dos carballeses foi fundamental para levarse sete dos oito puntos en xogo.

A continuación o Marmolería José Rey Xiria, tívose que empregar a fondo para poder sacar o partido a diante ante un rival con clara vantaxe física e antropométrica. De inicio víronse sorprendidos os xogadores carballeses polo xogo co pivote, que facía estragos no equipo local. A base de presionar máis, a defensa local foise facendo co mando do partido, e so as perdas no ataque posicional impediron que o marcador fose máis amplo, chegándose ao asubío final cun marcador de 22-20.

As rapazas do Punta del Este Xiria tiveron enfronte a un rival que tampouco lles puxo as cousas nada doadas. A actuación de Anna na portería local foi fundamental para acadar os puntos en xogo neste partido, no que no eido ofensivo destacou a título individual Nina, que foi un pesadelo para as súas defensoras. O segundo tempo a defensa carballesa foi adquirindo máis peso, e resultou vital para que se chegase ao final cun resultado de 20 – 15.